प्रधानमन्त्री शाहसँग भारतीय विदेश सचिव मिस्रीको भेटवार्ता
काठमाडौं — भारतीय विदेश सचिव विक्रम मिस्रीले बिहीबार प्रधानमन्त्री बालेन्द्र शाहसँग शिष्टाचार भेट गर्नुभएको छ।
भेटका क्रममा मिस्रीले भारतीय प्रधानमन्त्री नरेन्द्र मोदीका तर्फबाट प्रधानमन्त्री शाहलाई शुभकामना सन्देश सुनाउनुभएको भारतीय दूतावासले जनाएको छ।
भेटवार्तामा नेपाल–भारतबीचका विभिन्न द्विपक्षीय पहलको कार्यान्वयन र आगामी उच्चस्तरीय भ्रमणबारे छलफल भएको दूतावासले जनाएको छ। दुई देशबीच विभिन्न क्षेत्रमा सहकार्य अझ सुदृढ बनाउने सम्भावनाबारे पनि कुराकानी भएको छ।
मिस्री नेपालका परराष्ट्र सचिव अमृतबहादुर राईको निमन्त्रणामा बुधबारदेखि दुईदिने आधिकारिक भ्रमणमा काठमाडौं आउनुभएको हो। उहाँको भ्रमण प्रधानमन्त्री शाहको आगामी भारत भ्रमणको तयारीसँग जोडिएको छ — भ्रमणका क्रममा उहाँले नेपाली अधिकारीहरूसँग भ्रमणका एजेन्डाबारे छलफल गर्नुभएको छ।
भेटवार्तापछि दूतावासले सामाजिक सञ्जालमार्फत भेटबारे जानकारी दिएको छ।
