जापानसँगको खेल वर्षाका कारण नतिजाविहीन, नेपाल समूहविजेता बन्दै क्वाटरफाइनलमा
नागोया — एसियाली खेलकुद २०२६ अन्तर्गत पुरुष क्रिकेटको समूह ‘ए’ मा शनिबार भएको नेपाल र जापानबीचको खेल वर्षाका कारण नतिजाविहीन भएको छ। वर्षाले प्रभावित खेल १५ ओभरमा झारिएको थियो।
टस हारेर ब्याटिङ गरेको नेपालले १५ ओभरमा ४ विकेट गुमाएर १४९ रन बनायो। सन्दीप जोराले अविजित ५७ र लोकेश बमले अविजित ५२ रनको अर्धशतकीय पारी खेले। जोराले ३२ बलमा ५ चौका र ३ छक्का तथा बमले २२ बलमा १ चौका र ६ छक्का प्रहार गरे।
नेपालको इनिङ सकिएलगत्तै फेरि भारी वर्षा भएपछि जापानले ब्याटिङ गर्नै पाएन र खेल रद्द गरियो। जापानका लागि यो खेल जित्नैपर्ने थियो।
यसअघि शुक्रबार नेपालले अफगानिस्तानलाई ५ विकेटले हराएको थियो। यो नतिजासँगै नेपाल समूह ‘ए’ को विजेता बन्दै क्वाटरफाइनलमा पुगेको छ।
क्वाटरफाइनलमा नेपालले श्रीलंकासँग खेल्नेछ। आयोजक जापान भने समूह चरणबाटै बाहिरिएको छ।
